Россиялик саёҳатчи-блогер Максим Лимар квадрокоптер туфайли Ўзбекистондан Новосибирскка уча олмади. Бу ҳақда «Вести Новосибирск» хабар берди.

Маълум қилинишича, Новосибирск фуқароси Бухорода чегара назоратидан ўтаётганда буюмлари орасидан дрон топилгани сабабли қўлга олинган.

Максим Лимарнинг айтишича, Ўзбекистон қонунчилигига кўра, оғирлиги 250 граммдан ортиқ бўлган квадрокоптерлар мажбурий рўйхатга олиниши керак. Бироқ саёҳатчининг техникаси бор-йўғи 249 граммни ташкил этган (буни ишлаб чиқарувчи томонидан дрон ҳақидаги хусусиятлар ёзилган ҳужжат ҳам тасдиқлайди) ва шунинг учун у бу қоидага бўйсунмаслиги керак бўлган.

Қайд этилишича, шунга қарамай, квадрокоптер мусодара қилинган, блогернинг эса паспорти олиб қўйилиб, уй қамоғига олинган. Блогернинг сўзларига кўра, унга мақоми ҳақида ҳеч нарса айтилмаган, ҳуқуқлари тушунтирилмаган, шунингдек, у рус тилини ўртача биладиган адвокат билан таъминланган.

«Мен Ўзбекистонга мамлакат бўйлаб сайр қилиш ҳамда маҳаллий гўзалликларни томоша қилиш учун бордим. Божхона назоратидан ўтдим, барча жиҳозлар қўл юкимда эди. Мендан сумкамда нима борлигини сўрашди. Фото ва видео ускунаси борлигини айтдим. Рухсат беришди, ҳаммаси шу. Кетиш куни эса рўйхатдан ўтдим, кейин юкимни рўйхатдан ўтказдим. Божхона назоратидан ўтиб, паспорт назоратига бордим, ўша ерда муҳр қўйишди. Шундан кейин ходим келиб, ортга қайтишимни сўради. Ҳаммасини очинг дейишди, очдим. Дронни кўришганларида тез югура бошлашди ва мени бошлиқнинг кабинетига олиб боришди», — дейди блогер айбланаётган моддага кўра, уч йилгача қамоқ жазосига ҳукм қилиниши мумкинлигини таъкидлаган ҳолда.

Таъкидланишича, олдинда блогернинг қонунни бузган ёки бузмаганини кўрсатадиган экспертиза бор.

Аввалроқ Сурхондарёда блогер оиласига таҳдид бўлгани айтилганди. Шунингдек, Фарғонада блогер заҳарланиб, вафот этгани бўйча қўшимча маълумот берилганди.