Ўзбекистон Президенти Шавкат Мирзиёев Пекин шаҳрида  XXIV қишки Олимпия ўйинларининг тантанали очилиш маросимида иштирок этди. Бу ҳақда Президент матбуот хизмати хабар берди.

Маълум қилинишича, тадбир хорижий давлатлар етакчилари, расмий делегациялар ва халқаро ташкилотлар раҳбарлари иштирокида Пекиндаги «Қуш уяси» миллий стадионида бўлиб ўтган.

Маросим бадиий дастури ХХР раиси Сиз Цзиньпин томонидан илгари сурилган «Инсоният умумий тақдири ҳамжамияти» концепциясини ўзида мужассам этган бўлиб, Хитой халқининг қадимий тарихи ва бой маданияти, жаҳон иқтисодиёти пешқадами сифатида эришаётган улкан муваффақият ва ютуқлари, халқаро олимпия ҳаракатининг руҳи ва қадриятларини акс эттирган.

Сўнг Миллатлар паради бўлиб ўтган. Қишки Олимпиадада иштирок этаётган мамлакатларнинг спорт делегациялари, шу жумладан, Ўзбекистон жамоаси стадион бўйлаб юрган. Ўйинларда мамлакатдан қатанашаётган тоғ чанғичиси Комилжон Тўхтаев Ўзбекистон давлат байроғини тантанали кўтариб ўтган. Ёрқин спорт байрами авжида Олимпия олови ёқилган. Маросим байрамона мушакбозлик билан якунланган.

Маълумот ўрнида, 4–20 февраль кунлари ўтказиладиган Олимпия мусобақаларида спортнинг 15 та йўналиши бўйича 109 та медаллар тўплами ўйналади, улар учун дунёнинг 95 мамлакатдиан 4 мингдан зиёд спортчи курашади.

Аввалроқ Шавкат Мирзиёев Пекинга ташриф буюргани хабар берилганди.