17:22 | 07.10.23 2510
1 ноябрдан Умра зиёратини ташкил этишнинг янги талаблари кучга киради
Янги норма талабларига жавоб бермайдиган туроператорларга Умра тадбирини ташкил этишга рухсат берилмайди.
Вазирлар Маҳкамасининг 2023 йил 8 августдаги 345-сонли қарорига кўра, фуқароларга Умра зиёратларини ташкил этиш ва ўтказишга оид хизматларни кўрсатиш фақат маҳаллий туроператор томонидан амалга оширилади.
2023 йил 1 ноябрдан бошлаб мазкур қарорга киритилган қўшимча ва ўзгартиришлар кучга киради.
Унга кўра, Умра зиёратлари амалга ошириш учун қуйидаги ҳужжатлар талаб этилади:
- Умра тадбирини ташкил этиш ва ўтказиш хизматларини кўрсатиш учун қўшимча равишда диний (исломий) таълим йўналишлари бўйича таълим муассасаси ёки Ўзбекистон халқаро ислом академиясининг «Диншунослик», «Исломшунослик», «Ислом тарихи ва манбашунослиги», «Зиёрат туризми» ва «Ислом ҳуқуқи» таълим йўналишлари (мутахассисликлар) битирувчиси бўлган камида бир нафар мутахассиснинг мавжудлиги тўғрисидаги маълумот;
- Умра тадбирини ташкил этиш ва ўтказишга оид туризм хизматларини кўрсатмоқчи бўлган тақдирда, лицензия талабгори 100 минг АҚШ доллари эквивалентидан кам бўлмаган миқдордаги маблағларни Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Туризм қўмитасининг Хавфсиз туризм жамғармаси учун очилган қуйида келтирилган банк реквизитига захира қилинганлиги ҳақидаги маълумотни ўзи мустақил тарзда олиши зарур.
