Россия Мудофаа вазирлиги такомиллаштирилган «Ил-76МД-90А» оғир ҳарбий транспорт самолётига эга бўлди. Бу ҳақда «ТАСС» хабар берди.

Маълум қилинишича, самолёт Россия тизимлари ва ускуналари билан жиҳозланган, маҳаллий компонентлардан ишлаб чиқарилган.

«‘Авиастарʼ компанияси Россия Мудофаа вазирлиги учун ишлаб чиқарилган яна бир серияли ‘Ил-76МД-90Аʼ оғир транспорт самолётини фойдаланишга топширди. Самолёт парвоз синовлари муваффақиятли якунланганидан сўнг, авиация полки таркибига қўшилган», дейилади хабарда.

Маълумотларга кўра, ҳозирда яна бир «Ил-76МД-90А» синов жараёнини ўтамоқда. Шунингдек, бир қанча самолётларни ишлаб чиқариш йўлга қўйилган. «Ил-76МД-90А» биринчи парвозини 2012 йилда амалга оширган. Ил-76 нинг янгиланган версияси янги ПС-90А-76 двигателлари, ҳаводан мудофаа тизими, шунингдек, мустаҳкамланган шасси ва қанотни олган.

Аввалроқ Россия илк бор «Сармат» қитъалараро ракетасини синовдан ўтказганди. Шунингдек,  Россиянинг Украинага урушидаги асосий қуроли маълум қилинганди.