Давлат хавфсизлик хизмати Сирдарё вилояти бўйича бошқармаси Гулистон шаҳрида ноқонуний майнинг ферма фаолиятига чек қўйди.

Маълум бўлишича, хавфсизлик хизматининг вилоят бўйича бошқармаси ходимлари томонидан вилоят божхона ҳамда ички ишлар бошқармалари ходимлари билан ҳамкорликда тезкор тадбир ўтказилган. Тадбир давомида ноқонуний майнинг фермалар фаолиятига чек қўйилди.

Хусусан, Гулистон шаҳрида яшовчи 1981 йилда туғилган, муқаддам судланган шахс вилоят марказидаги нотурар бинолардан бирини ижарага олган ва яширин равишда электр тармоғига уланган. Аниқланишича, у ерда майнинг қурилмаларидан фойдаланиши оқибатида давлатга қарийб 532 миллион сўм зарар етказилган. Текширув давомида 19 дона майнинг қурилмаси ҳамда бошқа буюмлар ашёвий далил сифатида расмийлаштирилиб олинган. Мазкур ҳолатга нисбатан ҳуқуқий баҳо берилади.

Аввалроқ ДХХ Сирдарёда ноқонуний майнинг ферма фаолиятига чек қўйганди. Хорижий корхонада жами 7,7 миллион долларлик криптовалюта ишлаб чиқарилган.