Давлат ташрифи билан Ўзбекистонда бўлиб турган Илҳом Алиев Шавкат Мирзиёев билан Хиванинг кўзга кўринган жойларига ташриф буюрди. Бу ҳақда Президент матбуот хизмати хабар берди.

Қайд этилишича, 21 июнь куни бўлиб ўтган музокаралар якунида Мирзиёев ўзбек ва озарбайжон халқлари муносабатларининг тарихи бугунги ҳамкорлик учун мустаҳкам пойдевор яратганини таъкидлаганди.

Халқлар азалдан борди-келди қилиб, бир-бирининг маданиятини тўодирган. 2500 йилдан зиёд тарихга эга Хива бунда муҳим ўрин тутган. Шу жиҳатдан, Ўзбекистон ва Озарбайжон президентларининг бу қадимий шаҳарга ташрифи катта маънога эга.

Ичан қалъада 120 дан зиёд меъморий обидалар бор. Шу боис Хива шаҳри 1990 йил 12 декабрда UNESCO Маданий мерос рўйхатига киритилган.

Давлат раҳбарлари Ота дарвозадан кириб, Кўк минора, Кўҳна арк саройи, Шерғозихон мадрасаси, Жума масжиди, Тош ҳовлини томоша қилди, Алломалар музейи билан танишди. Президентлар Ичан қалъа яқинидаги Нуриллабой саройини ҳам бориб кўрган.

Аввалроқ Ўзбекистон ва Озарбайжон президентлари Хоразмга боргани ҳақида хабар берилганди.