Навоий давлат педагогика институти ўқитувчиси 2 минг доллар эвазига абитуриентни ўқишга киритмоқчи бўлгани аниқланди. Бу ҳақда Иқтисодий жиноятларга қарши курашиш департаменти ахборот хизмати хабар берди.

Маълум бўлишича, Бош прокуратура ҳузуридаги департаментнинг Навоий шаҳар бўлими томонидан тезкор тадбир ўтказилган. Аниқланишича, Навоий давлат педагогика институти ўқитувчиси Г.М. фуқаро Ш.ни пул эвазига ўқишга киритишни ваъда қилган. У Тошкент шаҳрида ишловчи танишлари орқали ушбу институтнинг жисмоний тарбия йўналишига ўқишга киритиб қўйиб, бошқа институтга кўчириб бериш эвазига 2000 долларларни олган вақтида ушланган.

Г.М.нинг кўрсатувига асосан давом этган тадбирда, институт талабаси Б.Р. институтнинг яна бир ўқитувчиси С.М.нинг топшириғига асосан 2000 долларларни олган вақтида ашёвий далиллар билан ушланган.

Аввалроқ Самарқанд давлат архитектура-қурилиш институти бўлим бошлиғи фуқародан 5000 доллар пора олганда қўлга тушганди.