Давлат хавфсизлик хизмати ходимлари Қашқадарё вилоятининг Китоб, Қарши туманлари ва Қарши шаҳрида «Жиҳодчилар» оқими аъзоларини қўлга олди.

Унга кўра, Китоб туманида яшовчи, 1998 йилда туғилган Қ.Т. 2020–2021 йилларда Россияда ишлаши даврида ижтимоий тармоқларда «Жиҳодчилар» диний эктремистик оқими аъзолари таъсирига тушган. Китобга келгач, ўз атрофидагиларга оқим ғояларини тарғиб қилган. Шунингдек, у интернетда Суриядаги жангарилар билан алоқа ўрнатиб, кўрсатмалари асосида Россия–Туркия йўналиши орқали уларнинг сафига бориб қўшилишни режалаштирган.

Шунингдек, Қарши туманида яшовчи, 1985 йилда туғилган Р.С. 2021 йилда Саудия Арабистонида ишлаш даврида «Жиҳодчилар» аъзолари таъсирига тушган ҳамда улар билан алоқа ўрнатиб, оқим ғояларини қўллаб-қувватлаган. Яшаш манзилига қайтганидан кейин ҳам тарғибот билан шуғулланган.

Бундан ташқари, Қарши шаҳрида яшовчи, 1993 йилда туғилган Ж.М. ҳам «Жиҳодчилар» таъсирига тушиб, Telegram’да гуруҳ ва канал ташкил қилган ва экстремистик ғояларни тарғиб қилган. Қарши шаҳар суди ҳукмига кўра, ёлғиз оналиги ва 9 ойлик фарзанди борлиги ҳисобга олиниб, унга нисбатан 3 йил муддатга озодликни чеклаш жазоси тайинланган.

Аввалроқ ҳам ДХХ Қашқадарёда «Жиҳодчилар» оқимининг бир неча тарафдорларини қўлга олгани хабар қилинганди. Шунингдек, Самарқандда «Ҳизб ут-Таҳрир» ва «Жиҳодчилар» экстремистик оқимлари тарғибчилари ушланган.