Шавкат Мирзиёевнинг таклифига биноан Туркманистон президенти Сердар Бердимуҳамедов 14 июль куни давлат ташрифи билан Ўзбекистонга келди. Бу ҳақда Президент матбуот хизмати хабар берди.

Тошкент халқаро аэропортида уни бош вазири Абдулла Арипов, ташқи ишлар вазири вазифасини бажарувчи Владимир Норов ва Тошкент шаҳар ҳокими Жаҳонгир Ортиқхўжаев кутиб олди.

Учрашувдан сўнг биродар мамлакат делегацияси Янги Ўзбекистон боғига ташриф буюриб, у ерда Туркманистон президенти Мустақиллик монументи пойига гул қўйди. Сердар Бердимуҳамедов мажмуа меъморий ечимлари ҳамда композициясининг мазмун-моҳияти ва хусусиятлари билан батафсил танишди.

Ўзбекистонга ташриф буюраётган олий мартабали меҳмонларнинг ушбу мажмуа билан танишуви анъанага айланган.

Эслатиб ўтамиз, Туркманистон Вазирлар Маҳкамаси раиси ўринбосари вазифасида ишлаган Сердар Бердимуҳамедов 17 январь куни Ўзбекистонга ташриф буюрганди. Шавкат Мирзиёев уни қабул қилиб, олий даражада эришилган келишувларнинг амалга оширилиш масаласини кўриб чиққанди.

Шунингдек, Шавкат Мирзиёев 15 март куни Туркманистоннинг янги президенти Сердар Бердимуҳамедовни сайловдаги ғалабаси билан табриклаган. Давлат раҳбари Гурбангули Бердимуҳамедовни муҳим сиёсий тадбир муваффақиятли ўтказилгани билан қутлаганди.