Бухоро вилояти Ғиждувон туманида даладаги шийпонда 9 ойлик чақалоқ ташлаб кетилди. Бу ҳақда вилоят Ички ишлар бошқармаси ахборот хизмати хабар берди.

Маълум бўлишича, 22 июл куни соат 16:07 да вилоят ИИБга туманнинг Кўлижаббор МФЙ Кўхна Найман қишлоғидаги «Шукур Тўхта» фермер хўжалигининг дала майдони ёқасидаги шийпонда тахминан 9 ойлик бола топиб олингани ҳақида маълумот берилган. Унинг туман тиббиёт бирлашмасига олиб борилгани ҳам айтилган.

Мазкур маълумот Ғиждувон тумани ИИБ Навбатчилик қисмида қайд этилиб, тезкор тергов гуруҳи томонидан ҳодиса содир бўлган жой кўздан кечирилган. Шу билан бирга, кечиктириб бўлмас терговга қадар текширув ҳаракатлари олиб борилган.

Ҳозирда шахси аниқ бўлмаган бола Ғиждувон туман тиббиёт бирлашмаси болаларни соғломлаштириш бўлимида шифокорлар назоратига олинган. Ҳолат юзасидан туман Ички ишлар бошқармаси томонидан терговга қадар текширув ҳаракатлари амалга оширилмоқда.

Аввалроқ Қорақалпоғистоннинг Нукус шаҳрида чақалоқ кўчага ташлаб кетилгани ҳақида хабар берилганди.