13:15 | 12.08.22

                       

Тошкентда 70 ёшли аёл 96 га кирган онасини пичоқлаб ўлдирди

Жиноят ишлари бўйича Тошкент шаҳар судида айбланувчига ҳукм ўқилди

Тошкентда ўз онасини ўлдирган аёлга суд ҳукми ўқилди. Бу ҳақда Тошкент шаҳар суди матбуот хизмати хабар берди.

Фото: «Bugun.uz»

Маълум қилинишича, 70 ёшли Х.Б. 96 ёшли онаси С.С. йиқилиб операция бўлганидан сўнг, батамом унга боғланиб қолган. Ишдан бўшаб, фақат қари онасига қарайдиган бўлган. Синглиси Р.Ҳ. ҳам унга кўмаклашиб турган. Юз ёшга яқинлашган онанинг оғриқ азобидан туну кун инграб чиқиши аёлни чарчатган.

Бу орада онанинг хотираси ҳам кирди-чиқди бўлиб қолган. Синглиси Р.Ҳ. овқат олиб келаман деб чиқиб кетган куни Х.Б ошхонада турган пичоқни қўлига олган ва ухлаб ётган онасининг кўкрагига бир неча бор санчган. Онасини ўлдириб қўйганини англагач, энди ўзини ўлдириш мақсадида қўлидаги пичоқ билан чап билаги ва бўйнини ҳамда кўкрак қафасларини кесиб ташлаган. Бу орада синглиси уйга келиб қолган ва тез тиббий ёрдам чақиртирган.

Жабрланувчи шифокорлар томонидан кўрсатилган бир неча кунлик тиббий ёрдамга қарамасдан вафот этган.

Х.Б.га нисбатан жиноят иши қўзғатилиб, иш судга оширилган. Суд мажлисида Х.Б.нинг қўшнилари ва бошқалар судланувчининг яхши аёл бўлгани, турмушга чиқмасада ота-онасига қарагани, меҳрибонлиги, зиёли экани, кейинги пайтда С.С.нинг бақир-чақирларини улар ҳам эшитишганини, унга нисбатан енгил жазо тайинлашни сўраган.

Жиноят ишлари бўйича Тошкент шаҳар судида фуқаро Х.Б. айбли деб топилган. Жиноят кодексининг 97-моддаси (қасддан одам ўлдириш) 2-қисми «в» банди билан 15 йил озодликдан маҳрум қилиш жазоси тайинланиб, Жиноят кодексининг 72-моддаси (шартли ҳукм қилиш) орқали тайинланган жазо шартлига алмаштирилиб, 3 йил синов муддати белгиланган. Унга нисбатан қўлланилган эҳтиёт чораси ўзгартирилиб, у дарҳол суд залида қамоқдан озод қилинган.

Бундан олдин, Наманганда онасини калтаклаган йигит қамалгани ҳақида хабар берилганди. Шунингдек, Тошкентда онасини қасддан ўлдирган йигит 10 йилга қамалган. Йигитнинг қотиллик қилишига эса аёлнинг уйга эркакларни олиб келиши сабаб бўлгани айтилган.

Мавзуга доир хабарлар билан танишинг: