Индонезиядаги футбол ўйинида юзага келган тартибсизликларда ҳалок бўлганлар сони 174 нафарга етди. Бу ҳақда «Sportbs.ru» хабар берди.

Қайд этилишича, Малангдаги гавжум стадионда тартибсизликлар, тиқилинчлик ва полициянинг кўздан ёш оқизувчи газ ишлатиши оқибатида 174 киши ҳалок бўлди. Кўпроқ қурбонлар фақат 1964 йилда Лимада қайд этилган.

Индонезиянинг Маланг шаҳрида (Шарқий Ява провинцияси) футбол ўйини вақтида юз берган тартибсизлик қурбонлари сони 174 кишига етди, 180 га яқин киши жароҳат олган.

Шу каби фожиа 1964 йилда Перу ва Аргентина терма жамоалари ўртасидаги Олимпиада ўйинларига саралаш ўйини чоғида 328 киши ҳалок бўлган ва минглаб одамлар жароҳат олган Лимадаги воқеалардан кейин тарихдаги футбол ўйини қурбонлари сони бўйича биринчи ўринни эгаллаган.

• Сўнгги 40 йил ичида футбол ўйинларидаги бошқа асосий фожиалар:
• 1982 йилда Лужникида «Спартак» ва Голландиянинг «Гарлем» жамоалари ўртасидаги ўйин охиридаги тиқилинчда 66 киши ҳалок бўлган;
• 1985 йилда Брюсселдаги стадионда «Ювентус» ва «Ливерпул» ўртасидаги еврокубок финали бошланишидан олдин трибунанинг қулаши оқибатида 39 киши ҳалок бўлган, юзлаб одамлар жароҳатланган;
• 1988 йилда Катмандудаги стадионда ёпиқ чиқишлар яқинида дўл ёғиши сабабли тиқилинчда 90 дан ортиқ мухлислар ҳалок бўлган;
• 1989 йилда Шеффилддаги «Ҳиллзборо» стадионида юз берган тиқилинчда «Ливерпул»нинг 96 нафар мухлиси ҳалок бўлган ва яна юзлаб одамлар жароҳатланган;
• 1996 йилда Гватемалада Коста-Рикага қарши жаҳон чемпионати саралаш ўйинида трибунадаги тиқилинч оқибатида 80 дан ортиқ мухлислар ҳалок бўлган, 140 дан ортиқ мухлис жароҳатланган;
• 2001 йилда Гананинг Аккра шаҳрида маҳаллий чемпионат ўйинидаги тартибсизликлар туфайли 120 дан ортиқ одам ҳалок бўлган;
• 2012 йилнинг февраль ойида Мисрнинг Порт Саид шаҳрида «Ал-Масри» ва «Ал-Аҳли» жамоалари ўртасидаги ўйиндан сўнг стадионда тартибсизликлар юзага келган ва натижада 74 киши ҳалок бўлганди. 47 дан ортиқ тартиббузарлар айбдор деб топилиб, улардан 11 нафари ўлимга ҳукм қилинди.

Эслатиб ўтамиз, аввалроқ Индонезияда футбол чемпионатидаги тартибсизлик оқибатида 130 нафарга яқин одам ҳалок бўлгани маълум қилинганди. Шу каби норозилик намоиши Ўзбекистоннинг «Навбаҳор» ва «Пахтакор» ўйини якунида юзага келган. Пенальти белгилаган ҳакамга мухлислар чиқинди улоқтиргани, ўйин якунида мухлислар ҳисобдан норози бўлиб, намойиш уюштиргани юзасидан муносабат билдирилгани маьлум қилинганди.