Россияда қисман мобилизация деярли тугади, тахминан, икки ҳафтадан кейин у якунланади. Бу ҳақда Владимир Путин Остонада ўтказилган матбуот анжуманида маълум қилди, деб хабар беради Deustche Welle.

Россия президентининг сўзларига кўра, режалаштирилган 300 минг кишининг ҳозирда 222 минг нафари сафарбарликка жалб этилган.

«Қўшимча чақирув режалаштирилмаган», — дейди Путин.

Россия президентининг қайд этишича, захирадаги ҳарбий хизматчилар махсус операция зонасига юборилишдан олдин мажбурий тайёргарликдан ўтади.

Аввалроқ 2022 йилнинг 11 октябрь куни Ростов ва Курск вилоятлари ҳокимияти сафарбарликнинг янги босқичи бошланганини эълон қилганди. Санкт-Петербургдаги Инсон ҳуқуқлари бўйича комиссар Светлана Агапитова ҳам сафарбарликнинг биринчи босқичи 10 октябрда якунланиши кераклигини айтганди. Сентябрь ойида «Дождь» телеканали Россияда сафарбарлик уч босқичда — 26 сентябрдан 10 октябргача, 11 октябрдан 25 октябргача ва 26 октябрдан 10 ноябргача бўлиб ўтиши ҳақида хабар берган.

Шунингдек, Кремль Россияда сафарбарликнинг «иккинчи тўлқини» бошланганини рад этилган.