Самарқанднинг Жомбой туманида юз берган ЙТҲда ҳайдовчи ва уч кунлик чақалоқ вафот этди. Бу ҳақда STV вилоят ИИБ берган хабарга таяниб хабар берди.

Маълум қилинишича, воқеа 18 октябрь куни Ширинкент—Ғазира автомобиль йўлининг 10-километрида юз берган. Н.Н. бошқарувидаги Spark йўлнинг қарама-қарши қисмига ўтиб кетиши оқибатида Nexia билан тўқнашган.

Оқибатда Spark ҳайдовчиси ҳамда Nexia’да бўлган, туғруқхонадан олиб келинаётган уч кунлик чақалоқ ҳалок бўлган.

Ҳолат юзасидан Жомбой вилояти ИИБ ҳузуридаги Тергов бошқармаси томонидан Жиноят кодексининг 266-моддаси 3-қисми (транспорт воситалари ҳаракати қоидаларини бузиш одамлар ўлимига сабаб бўлиши) билан жиноят иши қўзғатилган, дастлабки тергов ҳаракатлари олиб борилмоқда.

Аввалроқ Навоийда трактор тиркамасига урилган Cobalt ҳайдовчиси воқеа жойида ҳалок бўлганди. Шунингдек, ЙТҲга учраган «Уммон» аъзоси Зоҳид реанимация экани, Тошкента тўртта автомобиль иштирокида ЙТҲ содир бўлгани, Фарғонадаги ЙТҲда икки киши ҳалок бўлгани тўғрисида хабар берилганди.