Фарғонада аввалги жинояти учун 20 йил қамоқда ўтириб чиққан эркак уйига меҳмонга келган танишини ўлдириб қўйди. Бу ҳақда «Zamon» информацион дастурида маълум қилинди.

Маълум қилинишича, қамоқдан қайтган қўқонлик фуқаро Ататов укасининг уйида яшай бошлаган ва унинг олдига жазони ижро этиш муассасасида танишиб қолган фуқаро Мирзаев меҳмонга келган. Собиқ маҳкумлар суҳбатлашиб, спиртли ичимлик истеъмол қилган. Меҳмон мезбонни ҳақорат қилгани боис ўзаро жанжаллашган ва Ататов уйида бўлган темир бўлаги билан Мирзаевнинг турли жойларига урган. Шундан сўнг, у жабрланувчини ўзбошимчалик билан даволашга уриниб, уни икки сутка хонадонида сақлаган.

Ўтказилган судга оид экспертиза хулосасида келтирилишича, Мирзаев кўкрак қафасининг иккала томонидан тўққизта қовурғасининг синиши, ўпка йиртилиши оқибатида вафот этган.

Ататовнинг ҳаракатлари Жиноят кодексининг 104-моддаси (Қасддан баданга оғир шикаст етказиш) 3-қисми «д» бани билан малакаланиб, очиқ суд мажлисида кўриб чиқилган. Суд ҳукми билан у 8 йилга озодликдан маҳрум этилган.

Аввалроқ Тошкент вилоятида 14 млн сўм учун 26 ёшли таксичи ўлдириб кетилгани, Тошкент вилоятида маҳкумлардан бири иккинчисини ўлдириб қўйгани, Фарғонада 64 ёшли эркак келинини ўлдириб, бошини узиб олгани тўғрисида хабар берилганди.