Қирғизистонда ҳукуматнинг Кампир Обод сув омборини Ўзбекистонга бериш тўғрисидаги қароридан норозиларни оммавий равишда ҳибсга олиш бошланди, деб хабар беради Sputnik.

Қайд этилишича, Кампир Обод сув омборининг Тошкентга, қолган барча баҳсли ҳудудулар Бишкекка ўтиши тўғрисидаги Ўзбекистон—Қирғизистон чегарасидаги оид битимдан норозилар махсус қўмита тузган.

Мамалакат Ички ишлар вазирлиги қўмита аъзоларининг уйларида тинтув ўтказган, уларнинг айримлари «оммавий тартибсизликларга тайёргарликда» гумонланиб қўлга олинган. Асосий гумоналанувчи — парламент собиқ спикери Канат Исяев бир ой муддатга қамоққа олинган.

Маълумотларга кўра, 24 октябрь куни Бишкек марказида «Қирғизистон яхлитлигини сақлаш» учун марш ўтказилиши режалаштирилган.

Аввалроқ Қирғизистонда Кампир Обод сув омборининг Ўзбекистонга ўтишига қарши чиққан 16 нафар мухолифатчи ҳибсга олинганди.

Эслатиб ўтамиз, Ўзбекистон ва Қирғизистон ҳукуматлари икки давлат чегарасидаги Кампир Обод сув омборини бошқариш бўйича қўшма корхона тузишга келишган. «Кампир Обод авваллари тўлиқ ўзбек томони назоратида бўлган, аммо энди биз 50/50 улушга эга қўшма корхона тузамиз ва тўғонини биргаликда бошқарамиз, деб келишиб олдик», — деб ёзганди Қирғизистон президенти.