Шавкат Мирзиёев 24 октябрь куни Россия ҳукумати раисининг ўринбосари, саноат ва савдо вазири, Қўшма ҳукуматлараро комиссия ҳамраиси Денис Мантуров бошчилигидаги делегацияни қабул қилди. Бу ҳақда Президент матбуот хизмати хабар берди.

Қайд этилишича, учрашувда комиссия фаолиятининг асосий натижалари, шу жумладан, савдо-иқтисодий ва инвестициявий соҳалардаги ўзаро манфаатли ҳамкорлик лойиҳаларини илгари суриш масалалари кўриб чиқилган.

Ўзаро савдо ҳажмини янада ошириш, саноатда, ёқилғи-энергетика мажмуида, кимё, фармацевтика, тўқимачилик, озиқ-овқат ва бошқа тармоқларда кооперация лойиҳаларини амалга ошириш муҳимлиги қайд этилган.

«Ўзбекистон ва Россиянинг етакчи корхоналари ўртасидаги амалий шерикликни кенгайтириш бўйича икки томонлама дастурни тайёрлашга келишиб олинди», дейилади хабарда.

Эслатиб ўтамиз, Шавкат Мирзиёев апрель ойида ҳам «ИННОПРОМ. Марказий Осиё» халқаро саноат кўргазмасида иштирок этиш учун Россия делегацияси бошчилигида Ўзбекистонга келган Россия саноат ва савдо вазири Денис Мантуровни қабул қилганди.

Маълумот учун, Ўзбекистон ва Россия ташқи савдо айланмаси 2022 йил январь–апрель ойларида 2,6 миллиард долларни ташкил этган. Аввалроқ Ўзбекистон ва Хитой ўртасида 15 миллиард долларлик лойиҳаларни амалга ошириш бўйича келишувлар имзоланганди.