Тошкент метрополитенининг Чилонзор йўналиши «Буюк Ипак йўли» метро станциясида қолдириб кетилган шубҳали рюкзак аниқланди. Бу ҳақда ИИВ Транспорт ва туризм объектларида хавфсизликни таъминлаш департаменти хабар берди.

Қайд этилишича, 22 октябрь куни «Буюк Ипак йўли» метро станциясида Транспорт ва туризм объектларида хавфсизликни таъминлаш департаменти ходими томонидан электропоезд вагонида қолдириб кетилган рюкзак ва қутини аниқлаган.

Таъкидланишича, ушбу буюмлар ўриндиқ ёнида бўлган. Масъул ходим зудлик билан навбатчилик қисмига хабар берган. Рюкзак ва қутида портловчи қурилма бор-йўқлигини текшириш учун ҳодиса жойига ИИВ махсус гуруҳи жалб этилган.

Текширув вақтида қолдириб кетилган буюмлар ичидан портловчи қурилмалар топилмаган. Орадан 30 дақиқа ўтгач, метрополитен ходимига фуқаро мурожаат қилиб, вагонда рюкзак ва қутиси қолиб кетганини билдирган. Фуқаро билан суҳбат ўтказилиб, далолатнома тузилган ва қолдириб кетилган буюмлар ўз эгасига қайтарилган.

Аввалроқ Тошкент метросида сумкасида бомба борлигини айтган қиз ҳибсга олингани тўғрисида хабар берилганди. Суднинг қарорига кўра, унга беш сутка маъмурий қамоқ жазоси тайинланган.