9:52 | 02.11.22

                       

Эрон яқин кунларда Саудия Арабистонига ҳужум қилиши мумкин — WSJ

Мамлакатдаги масжидлар гумбазида қасос қизил байроқлари кўтарилди

Эрон яқин кунларда Саудия Арабистонига ҳужум қилиши мумкин. Бу ҳақда The Wall Street Journal хабар берди.

Қайд этилишича, Саудия разведкаси Эрон яқин 48 соат ичида қиролликка ҳужум қилиши ҳақида хабар берган.

Саудия Арабистони АҚШ билан разведка маълумотларини ўртоқлашган. Унда Эроннинг қиролликдаги нишонларга яқинда ҳужум қилиши ҳақида огоҳлантирилган. Бу АҚШ ва бошқа ҳарбий кучларнинг Яқин Шарқдаги жанговар тайёргарлигини оширишига олиб келади.

Расмийларга кўра, огоҳлантиришга жавобан Саудия Арабистони, АҚШ ва бошқа бир қатор қўшни давлатлар ўз ҳарбий кучларига нисбатан огоҳлантириш даражасини оширган.

Қизил байроқлар охирги марта 2020 йилнинг январь ойида АҚШ Қосим Сулаймонини ўлдирганида кўтарилганди ҳамда Эрон Вашингтоннинг Эрбил шаҳридаги қўшинларига ҳужум қилганди.

Эслатиб ўтамиз, аввалроқ Эрондаги мақбарада содир бўлган отишмада 15 киши ҳалок бўлгани ҳақида хабар берилганди. Шунингдек, Эрондаги сиёсий маҳбуслар сақланадиган қамоқхонада ёнғин чиққани маълум қилинганди.

Эронда 22 ёшли Маҳса Аминининг вафоти сабаб сентябрь ўрталарида бошланган норозилик намойишлари фонида содир бўлган. Қиз ҳижобни «нотўғри» ўрагани учун полиция томонидан ушланганидан кейин шифохонада вафот этган.

Сентябрь охирларига келиб, Эрон куч тузилмалари намойишчиларга қарши жанговар қуроллардан фойдаланишни бошлаган. Инсон ҳуқуқлари ҳимоячиларига кўра, 25 октябрь ҳолати бўйича камида 234 киши ҳалок бўлган, уларнинг 29 нафари вояга етмаганлардир.

Мавзуга доир хабарлар билан танишинг: