Ўзбекистоннинг айрим ҳудудларида тинимсиз ёғингарчилик сабаб сув тошқинлари кузатилмоқда.

Uzb_Meteo Telegram каналининг хабар беришича, Қашқадарё вилоятининг Қамаши ва Деҳқонобод туманидан оқиб ўтувчи сел ва сой ўзанларидан сел оқиб ўтмоқда.

«Тасвирлардан ҳозирча сел сувлари сой ва сел ўзани ичида оқиб ўтаётгани, талофат даражаси юқори хавфга эга эмаслигини кўриш мумкин», дейилади хабарда.

Шунингдек, кучли ёмғир сабаб Тошкент кўчаларини ҳам сув босмоқда.

Фавқулодда вазиятлар вазирлиги сел хавфи бўлганда зарур ҳаракатлар бўйича тавсиялар берди:

• сел оқимларидан фақат қочиб қутилиш мумкин. Сел хавфи тўғрисида ҳабар эшитгандан сўнг дархол хавфсиз жойга кўчиш ҳаракатларини қилиш керак. Сел оқимининг тез фурсатда шаклланиши, унинг тезлигини ҳисобга олган ҳолда, хабар тарқатиш ва муҳофаза тадбирларини бажариш учун вақт жуда чегараланганлигини (бир неча дақиқадан 10-20 дақиқагача бўлиши мумкин) доимо ёдда тутиш лозим;
• сел оқимидан халос бўлишнинг иложи бўлмаса, баландроқ тепалик устига, дарахтга ёки бирор баланд мосламалар устига чиқиш керак. Одатда сел 3-5 соат давом этиши мумкин;
• сел оқими ўтгандан сўнг девор ва устунларнинг ҳолатини, газ, электр ва сув таъминотининг созлигини текшириш зарур.