14:50 | 03.11.22

                       

Бухорода 20 нафардан ортиқ эркакка ОИТС юқтирган 20 ёшли аёл уч йилга қамалди

У тунги клубда «официант» бўлиб ишлаган

Бухорода 20 нафардан ортиқ эркакка ОИТС юқтирган 20 ёшли аёл уч йилга қамалди. Бу ҳақда Жиноят ишлари бўйича Ғиждувон тумани суди масъули маълум қилди.

Қайд этилишича, 2002 йилда Ғиждувон туманида туғилган М.Р. 11-синфни тугатгач, оиласидагилар билан ўзаро жанжаллашиб, ўрталарида келишмовчилик юзага келган, натижада М.Р. уйдан чиқиб кетган ва туман марказидаги тунги клублардан бирига ишга кирган.

У иш фаолияти давомида бир нечта эркаклар билан доимий ишқий муносабатда бўлиб келган. Кейинчалик соғлигидаги муаммолар сабаб геникологга мурожаат қилган. Шундан сўнг, унга ОИТС ташхиси қўйилган ва шу заҳоти мазкур касаллик рўйхатга олинган.

М.Р.га эндиликда эркаклар билан жинсий алоқа қилиши мумкин эмаслиги, агар амал қилмаса Жиноят кодексининг тегишли моддалари билан жиноий жавобгарликка тортилиши тушунтирилган.

Шунингдек, у тунги клубдаги ишларидан бўш вақтида фоҳишалик билан шуғилланишда давом этган. Арзимас пул эвазига эркаклар билан жинсий алоқага киришиб, шерикларидан касаллигини яшириб келган.

Олиб борилган тергов-суриштирув ҳаракатлари давомида М.Р. йигирмадан ортиқ эркакка ОИТС касаллигини қасддан юқтиргани маълум бўлган. Тергов давомида, айбдор пул ишлаш учун ўз касаллигини бошқаларга қасддан юқтирганини тан олган.

Аввалроқ Андижон вилояти Шаҳрихон туманида ОИТСга чалинган, 2020 йилдан бери диспансер назоратига олинган эркак касалликни бир неча аёлга юқтиргани учун қамалганди. Шунингдек, Бухорода фоҳиша аёл 40 эркакка ОИТС юқтиргани хабар қилинганди. Бундан ташқари, Бухорода ОИВ инфекциясини била туриб ўзгага юқтирган бошқа бир аёлга чора кўрилган.

Мавзуга доир хабарлар билан танишинг: