Ўзбекистонда 5-6 ноябрь кунлари кузатиладиган об-ҳаво маълумоти эълон қилинди. Бу ҳақда «Ўзгидромет» хабар берди.

Қайд этилишича, Ўзбекиситон ҳудудига нисбатан юқори ҳарорат фонида Каспий денгизи, Туркманистон ва Эрон ҳудудларидан нам булутли массивлар кириб келиши давом этади.

Шунингдек, 5 ноябрь, шанба куни республика ҳудудининг катта қисмида кечаси ва эрталаб ёмғир ёғиши сақланиб туради. Фақат Қорақалпоғистон ва Хоразм вилоятида куннинг иккинчи ярмида ёғингарчилик кузатилади.

6 ноябрь, якшанба куни мамлакат ҳудудининг катта қисмида яна ёмғир ёғади, тоғ олди ва тоғли ҳудудларда ёмғир жадал ёғади. Баланд тоғларда ёмғир ва қор кўринишидаги ёғингарчилик бўлади. Республика шимолида ва Фарғона водийси вилоятларида ёғингарчилик кутилмайди.

Шу билан бирга, 5-6 ноябрь кунларида ҳарорат фони деярли ўзгармайди. Ҳаво ҳарорати кечалари 5-10 даража илиқ, кундуз кунлари 12-17 даража илиқ атрофида бўлади. Кечаси ва эрталаб баъзи жойларга туман тушиши мумкин.

Эслатиб ўтамиз, аввалроқ «Ўзгидромет» бош директори Шерзодхўжа Ҳабибуллаев Facebook’даги саҳифасида республиканинг саккизта вилоятида ёғингарчиликнинг кескин кучайиши муносабати билан сел-сув тошқинлари кузатилишидан огоҳлантириб, ушбу ҳудудларда сел хавфи эълон қилингани ҳақида хабар берилганди.