Хитой 8 январдан бошлаб мамлакатга келувчи фуқаролар учун карантин талабларини бекор қилди. Бу ҳақда мамлакат Миллий соғлиқни сақлаш комиссиясига таяниб, Reuters хабар берди.

Хитойда мамлакатга келувчилар учун карантин коронавирус пандемияси бошидан бери сақланиб қолмоқда. У 2022 йил кузида енгиллаштирилган — карантин муддати 10 кундан саккиз кунга туширилганди.

Қайд этилишича, Хитойга киришда карантин тўлиқ бекор қилинган тақдирда ҳам охирги 48 соат давомида коронавирусга топширилган тест натижасини тақдим этиш керак бўлади. Мамлакатда 20 декабрь кунининг ўзида 37 миллион кишида коронавирус тасдқиланган, декабрь бошидан бери эса COVID-19 аниқланган фуқаролар сони 250 миллионга етган.

Аввалроқ Хитойнинг соғлиқни сақлаш бўйича давлат комиссияси 14 декабрдан бошлаб коронавируснинг белгисиз шакли билан касалланганлар сонини кунлик ҳисоботларда кўрсатмаслиги хабар қилинганди.

Эслатиб ўтамиз, ноябрь охирларида Хитойнинг йирик шаҳарларида мамлакат ҳукумати томонидан олиб борилаётган коронавирус сиёсатига қарши намойишлар бошланганди. Бунинг натижасида Хитой коронавирус чекловларини енгиллаштирди — мамлакатда умуммиллий ПЗР-тест бекор қилинган ва бир вилоятдан бошқасига тестдан ўтмасдан ҳаракатланишга рухсат берилди.