Ўзбекистон ҳамда Россиянинг «Газпром» компанияси газ соҳасида ўзаро ҳамкорлик юзасидан «йўл харитаси»ни имзолади. Бу ҳақда компания ахборот хизмати хабар берди.

Хабарда келтирилишича, Ўзбекистон энергетика вазири Жўрабек Мирзамаҳмудов ва «Газпром» компанияси директорлар кенгаши аъзоси Алексей Миллер ўртасида ишчи учрашув бўлиб ўтган. Унда томонлар ўзаро ҳамкорликнинг долзарб ва истиқболли масалаларини кўриб чиқди.

Шунингдек, учрашувда Алексей Миллер ҳамда Жўрабек Мирзамаҳмудов газ соҳасидаги ҳамкорлик бўйича «йўл харитаси»ни имзолади.

Эслатиб ўтамиз, аввалроқ Жўрабек Мирзамаҳмудов энергия таъминотдаги узилишлар юзасидан изоҳ берганди. Унинг сўзларига кўра, ҳозирги об-ҳаво шароити жиддийроқ талафотларнинг олдини олиш мақсадида режали чекловлар ўрнатишни тақозо этмоқда. Шунингдек, Энергетика вазирлиги Ўзбекистонга Туркманистондан газ импорти тўлиқ тўхтатилганини маълум қилганди. Бироқ кейинчалик Туркманистон Ўзбекистонга газ етказиб беришни қайта тиклаганди.

Бундан ташқари, Қозоғистон президенти Тўқаев Қозоғистон Россия ва Ўзбекистон билан газ иттифоқини кўриб чиқишга тайёрлиги, шунингдек, Россия президенти матбуот котиби Россия, Қозоғистон ва Ўзбекистон ўртасида уч томонлама иттифоқ тузиш ғоясига изоҳ берганди.