Коронавирусга қарши курашиш штаби аъзоси Нурмат Отабеков Ўзбекистонга коронавируснинг «британча» штамми кириб келиши қатъий карантинга қайтишга асос эмаслигини билдирди, дея хабар бермоқда «Kun.uz».

«Айнан ҳозирги ҳолат бўйича карантин қайтишига умуман асос йўқ, деб ҳисоблаймиз. Агар ҳаддан ортиқ хотиржамликка берилсак, ҳаммамиз Ўзбекистонни ташлаб, чет давлатларда сайр қилишни бошласак, касалликнинг катта оқимда келишига йўл қўйиб берадиган бўлсак, чекловлар киритилишига асос бўлиши мумкин. Халқимиз мутахассисларнинг тавсияларига тўғри риоя қилиб, ҳаёт тарзини шакллантирса, жиддий карантинга рўбарў келмаймиз.

Ҳозирда баъзи давлатлар қайта карантинга киряпти, баъзилари эса чекловларни юмшатяпти. Нима бўлганда ҳам, вазиятга қараб иш тутилади», — дейди Нурмат Отабеков. У «британча» штамм болалар орасида кўпроқ тарқалаётган бўлса-да, таълим муассасаларининг ёпилиши бўйича ҳозирда ҳеч қандай фикр мавжуд эмаслигини айтиб ўтган.

«Таълим муассасалари ёпилиши бўйича умуман фикр йўқ. Карантин тадбирлари жорий қилинаркан, хавф остида бўлган гуруҳга алоҳида эътибор берилади. Шунинг учун ҳам мабодо карантинга эҳтиёж бўлса, аҳолининг қайси қатлами хавф гуруҳида эканлигини аниқлаб, бир қарорга келинади», — дея таъкидлаган штаб аъзоси.

Аввалроқ Отабеков коронавируснинг «британча» штаммининг одамлар орасига киришига йўл қўйилмаганини маълум қилган эди. Эслатиб ўтамиз, 30 январь куни коронавируснинг «британча» штамми Ўзбекистонга кириб келган. У 23 январь куни Дубайдан қайтиб келган 10 ёшли қизчада аниқланган. ССВ эса коронавируснинг янги штамми аниқланган қизча ҳақида нима учун 1 ҳафтадан кейин эълон қилинганига изоҳ берган.