Ўзбекистонда тадқиқот давомида вакциналанган кўнгилли фуқаронинг соғлигида ножўя ўзгаришлар кузатилса, унинг саломатлигини тиклашга сарфланган харажатлар тўлиқ қопланади ёки унга бепул тиббий хизматлар кўрсатилади. Бу ҳақда Инновацион ривожланиш вазирлиги ахборот хизмати хабар берди.

Хабарга кўра, клиник тадқиқот давом этаётган пайтда хоҳ биринчи ёки иккинчи доза бўлсин, фуқарода оғир ножўя ўзгаришлар кузатилаётган бўлса, улар кўрсатмага биноан шифохонага ётқизилади ҳамда даволаш муолажалари тўлиқ қопланади.

Маълумот учун, 4 февраль ҳолатига кўра Ўзбекистонда Хитойнинг коронавирусга қарши «ZF 2001» вакцинаси синовида иштирок этиш учун умумий ташриф буюрганлар 13 813 нафарни ташкил этган, яъни шунча одам тадқиқотда иштирок этиш истагини билдириб, улардан ҳозирча фақат 6337 нафар кўнгилли вакцинанинг 1-дозаси билан ва 998 нафари вакцинанинг 2-дозаси билан эмланган.

Эслатиб ўтамиз, аввалроқ Инновацион ривожланиш вазири вирусга қарши эмланганидан сўнг антитананинг ҳосил бўлгани ҳақида маълум қилган.