Telegram судья, прокуратура, хавфсизлик хизмати ходимлари ва журналистларнинг телефон рақами ҳамда манзиллари эълон қилинган каналларни блоклаб қўйди. Бу ҳақда Telegram асосчиси Павел Дуров ўзининг каналида маълум қилди.

Шу билан бирга, у Россиядаги намойишда қатнашганларнинг ҳам шахсий маъломотлари эълон қилинган каналларга блок қўйилганини таъкидлаган.

«Теlegram’дан бу каби фойдаланиш бевосита зўравонликка даъват қилишни тақиқловчи қоидаларимизга зид келади. Россиядаги вазиятни ҳисобга олиб, шошилинч қарор билан зарар етказишни истамаслигимиз боис вазиятни яхшилаб таҳлил қилдик», — дейди Дуров.

Унинг қўшимча қилишича, ушбу каналларнинг мавжудлиги iOS учун фавқулодда мессенжер янгиланишини амалга оширишга имкон бермаган. «Apple» унга розилик бермаган ва Telegram маъмурияти «муаммоли» каналларни блоклaшга қарор қилган.

Эслатиб ўтамиз, аввалроқ Telegram Google Play’дан ўчириб юборилиши мумкинлиги ҳамда Американинг «Хавфсиз интернет коалицияси» нотижорат ташкилоти «Apple» компаниясига қарши Telegram мессенжерини дастур дўконидан олиб ташлаш тўғрисида судга мурожаат қилгани ҳақида хабар берилганди. Шунингдек, Telegramʼда хавфсизликнинг жиддий заифлиги аниқлангани ҳақида хабар берилган.