Самарқанд вилояти Ургут туманида севган қизининг расмларини тарқатиш билан қўрқитиб, акасидан 800 АҚШ доллари талаб қилган йигит қўлга олинди. Бу ҳақда Самарқанд вилояти Ички ишлар бошқармаси ахборот хизмати хабар берди.

Маълум қилинишича, 2021 йил 16 январь куни М.Д. исмли фуқаро туман Ички ишлар органлари фаолиятини мувофиқлаштириш бошқармасига ариза билан мурожаат қилган. Ўз аризасида А.К. исмли шахс унга синглисининг расмлари борлигини, уларни TikTok ҳамда бошқа ижтимоий тармоқларда тарқатиш билан қўрқитган. Расмларни тарқатмаслик эвазига 800 АҚШ доллари талаб қилган.

«Интернетда бир қиз билан танишиб қолган эдим. Орадан 10–15 кун ўтиб, телефонда гаплашишни бошладик. Бир-биримизга расм юбориб турардик. Қиздан пул сўраганимнинг сабаби зарур бўлиб қолди. Онам шифохонада даволанаётган эди. Қарзларим кўпайиб кетди. Шароитим оғирлашиб қолди. 800 доллар бериб туринг, деб қарз сўрадим, жавоб ёзмади. Телефон қилдим, кўтармади. Бир кундан сўнг қизнинг акаси билан гаплашдим. ‘Сени шарманда қилганим йўқ эди, энди шармандангни чиқараман. Синглинг билан бирга тушган расмларимизни энди тарқатаман. Пулни ҳам берасан, қизни ҳам беришга мажбур берасан деб айтдимʼ», — дейди йигит.

Ҳозирда ҳолат юзасидан суриштирув ишлари давом этмоқда.

Аввалроқ Самарқандда олий таълим муассасаси ректорига телефонда таҳдид қилган Коррупцияга қарши курашиш агентлигининг сохта ходими аниқлангани ва Бухорода корхона раҳбарларини қўрқитиб, 30 минг доллар талаб қилган ишчилар ушлангани ҳақида хабар қилинганди.