Британиянинг «AstraZeneca» фармацевтика компанияси янги ишлаб чиқарилган вакцинани Жанубий Африкада аниқланган штаммга қарши курашда самарали бўлиши учун ишлашда давом этади.  Бу ҳақда вакцина устида иш олиб борган Оксфорд университети ходими Сара Гилберт BBC’га берган интервьюсида маълум қилди.

Унинг сўзларига кўра, вакцинанинг янги кўриниши кузга қадар тайёр бўлиши мумкин.

“Технологияни осонгина мослаштириш мумкин. Биз вакцинанинг ушбу кўринишини ўзида янги штаммни аниқлай оладиган антитаначалар ҳосил қилишига умид қиляпмиз, ана ўшанда бу гриппга қарши вакциналар билан ишлашга жуда ўхшаш бўлади», дея изоҳлади Гилберт.

Витватерсренд университети (Жанубий Африка) ва Оксфорд томонидан ўтказилган тадқиқотлар шуни кўрсатдики, Буюк Британия вакцинаси Жанубий Африкада топилган коронавируснинг янги турига нисбатан самарасиз. Тадқиқотда 2 минг киши иштирок этди ва жараён давомида олимлар Жанубий Африкада кенг тарқалган янги штаммга енгил ва ўрта даражада чалинганда, препаратнинг ҳимоя қила олмаслигини аниқлашди.

Гилбертнинг таъкидлашича, вакцина касалликнинг оғир шаклларидан ҳимоя қилишда самарали бўлиб қолади. Жанубий Африка штаммини қисқартирмаса-да, ўлим, касалхонага ётқизилиш ва оғир ҳолатларни камайтиради.

«Инфекция енгил ва аломатларсиз бўлса ҳам, одамларнинг коронавирус билан касалхонага тушишининг олдини олиш жиддий таъсирга эга бўлади», — дейди у.

«AstraZeneca» томонидан маълум қилинишича, Жанубий Африкада ўтказилган тадқиқот танловли характерга эга бўлиб, қамрови кичик ва иштирокчиларининг аксарияти ёш, соғлом одамларни ташкил этган. Бу, компания маълумотига кўра, вакцинанинг Жанубий Африка штаммига қарши самарадорлигини керакли тарзда кўрсата олмайди.

Аввалроқ ЖАР самарадорлиги пастлиги сабаб «AstraZeneca» вакцинасидан фойдаланишни тўхтатган, шунингдек, Испанияда «AstraZeneca» вакцинаси билан кексаларни эмлаш тақиқланганди.