Давлат активларини бошқариш агентлиги 2020 йил 16 декабрда агентлик томонидан берилган «Coca-cola Ichimligi Uzbekiston, Ltd» МЧЖ устав капиталидаги давлат улушини сотиш жараёни бошланиши тўғрисидаги эълонга мувофиқ, сотиш жараёнининг биринчи босқичи якунланганини маълум қилди.

Хабарга кўра, давлат улушини сотиб олиш учун қизиқиш билдирган талабгорлардан таклифлар 2021 йил 15 январга қадар қабул қилинган. Давлат улушини сотиб олиш бўйича агентликка ва молиявий маслаҳатчига Осиё, Европа, Америка ва Африка қитъалари мамлакатларидан бир қанча талабгорларнинг таклифлари келиб тушган.

Қайд этилишича, талабгорлардан келиб тушган барча таклифлар Ўзбекистон Республикасининг «Масъулияти чекланган ва қўшимча масъулиятли жамиятлар тўғрисида»ги Қонунининг 20-моддасини инобатга олган ҳолда ҳамда компания устави ва унинг фаолиятини тартибга солувчи ички ҳужжатлар талабларига мувофиқ, компаниянинг иккинчи мулкдори билан келишилган ҳолда кўриб чиқилгач сотиш учун белгиланган мезонларга мос келган деб эътироф этилган талабгорлар аниқланган ҳамда кейинги босқичга ўтказилган.

«Ушбу талабгорлар билан музокаралар жараёни давлат улушини сотиш бўйича жалб этилган халқаро маслаҳатчилар – ‘Rothschild & Cie’ инвестиция банки (молиявий маслаҳатчи, Франция) ва ‘Dentons’ юридик фирмаси (юридик маслаҳатчи, Буюк Британия) иштирокида давом эттирилади.

Мазкур босқичда талабгорлар билан ошкор этмаслик тўғрисидаги тегишли битимлар имзоланади. Компания тўғрисидаги қўшимча маълумотлар, жумладан, Ахборот меморандуми, Компаниянинг молиявий ҳисоботлари, бизнес-режаси, юридик, молиявий ва солиқ жиҳатдан ўрганиш ҳисоботлари уларга тақдим этилади», — дейилади хабарда.

Эслатиб ўтамиз, аввалроқ давлат активларини бошқариш агентлиги матбуот хизмати Коррупцияга қарши курашиш агентлигининг «Cоcа-Cоla Ichimligi» корхонасини хусусийлаштириш жараёнлари ва тендерини тўхтатиш юзасидан киритган тақдимномасига муносабат билдирганди. Шунингдек, Президент Шавкат Мирзиёев раислигида давлат иштирокидаги корхоналарни ислоҳ қилиш ҳамда давлат активларини хусусийлаштириш масалалари бўйича ўтказилган видеоселектор йиғилишида Ўзбекистонда 500 га яқин давлат активлари сотувга қўйилиши маълум бўлганди.