Президентнинг «Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида»ги фармони билан «Имом Бухорий» зиёрат туризми йўлдош телеканали ташкил этилади. Бу ҳақда Туризмни ривожлантириш давлат қўмитаси матбуот хизмати «Bugun.uz»га маълум қилди.

Қайд этилишича, фармонга мувофиқ қўмита Ўзбекистон Миллий телерадиокомпанияси, Вазирлар Маҳкамаси ҳузуридаги Дин ишлари бўйича қўмита, Фанлар Академияси, Олий ва ўрта махсус таълим вазирлиги, Ўзбекистон халқаро ислом академияси ва Имом Бухорий халқаро илмий-тадқиқот маркази билан биргаликда уч ой муддатда буюк аллома ва уламолар, айниқса, Имом Бухорий меросини кенг кўламда оммалаштириш ва тарғиб қилиш мақсадида индонез, бенгал, малай, турк, араб, ҳинд, урду, пушту ва бошқа хорижий тилларда «Имом Бухорий» зиёрат туризми йўлдош телеканалини ташкил этиши белгиланган.

Шунингдек, қўмита хорижий мамлакатларда телеканалнинг мухбирлари фаолият олиб боришини назарда тутган ҳолда ташкил этиш ва уни ривожлантириш концепциясини ишлаб чиқиб, Вазирлар Маҳкамасига киритилиши маълум қилинган.

Аввалроқ Ўзбекистон бўйлаб янги авиа ҳамда темир йўл қатновлари йўлга қўйилиши ҳақида хабар берилганди. Унга кўра, бир ой муддатда ички ва зиёрат туризмини ривожлантириш доирасида авиа ҳамда темир йўл қатновлари амалга оширилади.