Тошкент вилояти Зангиота туманида 31 январь куни фуқародан 100 минг сўм пулни босқинчилик йўли билан олмоқчи бўлган жиноий гуруҳ қўлга олинди. Бу ҳақда вилоят Ички ишлар бош  бошқармаси ахборот хизмати ҳабар берди.

Таъкидланишичa, 31 январь куни соат 17:00 да Фарғона вилоятида яшовчи 19 ёшли Г.И. танишлари 25 ёшли Ш.М. ҳамда Тошкент вилоятида яшовчи 23 ёшли З.О. ва Д.Т.лар билан бирга Зангиота тумани Тарнов маҳалласи ҳудудига келган.

Улар ушбу манзилга ўзларига таниш бўлган Фарғона вилояти Фурқат туманида яшовчи 21 ёшли М.ни (исми ўзгартирилган) олиб келиб, ундан 100 минг сўм миқдоридаги пулни талаб қилган ва унга тан жароҳати етказиб, воқеа жойидан яширинган.

Ҳолат юзасидан Тошкент вилояти ИИББ ходимлари томонидан олиб борилган қидирув-суриштирув ишлари давомида шахсларнинг кимлиги аниқланиб, қўлга олинган.

Мазкур ҳолат юзасидан  ушбу фуқароларга нисбатан Жиноят кодексининг 164-моддаси (Босқинчилик) 2 қисми «а», «б» бандлари билан жиноят иши очилиб, тергов ҳаракатлари олиб борилмоқда.