Янгиликлар - 13:08 · 10.02.2021

Чилонзорда қарийб 57 млн сўмлик қадимий тангаларни сотаётган эркак ушланди

Тошкент шаҳри Чилонзор туманида салкам 57 миллион сўмлик қадимий тангаларни сотаётган фуқаро қўлга олинди. Бу ҳақда Бош прокуратура ахборот хизмати «Bugun.uz»га хабар берди.

Маълумотларга кўра, Бош прокуратура ҳузуридаги Департамент ҳамда ДХХнинг Чилонзор тумани бўлимлари томонидан тезкор тадбир ўтказилган. Унда фуқаро Г.М. фуқаро Н. ва М.ларнинг ишончига кириб, уларга рангли металл кўринишидаги 4 дона тангани 1899 йилда Россия империясида ишлаб чиқарилган ҳақиқий қадимий танга сифатида баҳолаб, 56,9 миллион сўмга сотаётган вақтида ашёвий далил билан ушланган. Шунингдек, Г.М. муқаддам Н.га 1 дона рангли металл тангани қадимий танга сифатида баҳолаб 14,1 миллион сўмга сотганлиги аниқланган.

Экспертиза хулосасига кўра, 5 дона танганинг 1 таси 1899 йилда Россия империясида ишлаб чиқарилган ҳақиқий олтин танга, қолганлари унинг нусхаси эканлиги қайд этилган. Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.

Аввалроқ Тошкентда салкам 17 миллиард сўмлик қимматбаҳо тошларни сотаётганлар ушлангани ҳақида хабар берилган эди.