Тошкент шаҳри Бектемир туманидаги кўп қаватли уйларнинг лифтида вояга етмаган қизларга тегажоғлик қилган эркак 1 йил 6 ойга қамалди. Бу ҳақда «UzNews» хабар берди.

Хабарга кўра, 36 ёшли эркак вояга етмаган қизларни таъқиб қилиб, жинсий яқинлик қилмоқчи бўлган. Судланувчи 28 ноябрь куни маст ҳолда бўлиб, Бектемир туманидаги кўп қаватли уйлардан бирида лифтга вояга етмаган икки қизнинг кириб кетаётганини кўрган ва 16 ёшга тўлмаган қизларнинг ортидан лифтга кирган. Лифт 1-қаватдан 6-қаватга кўтарилгунга қадар беҳаё ҳаракатлар қилган. Қизлардан бирининг қўлларидан ушлаб, ўзига тортиб, қўли билан зўрлик ишлатган. Лифт эшиги очилиши билан воқеа жойидан яширинган.

Таъкидланишича, орадан тахминан 10 дақиқа ўтгач, лифтга бошқа вояга етмаган қизнинг кириб кетаётганини кўрган ва унинг ортидан лифтга кирган. Лифт 6-қаватга кўтарилгунга қадар эркак ахлоқсиз ҳаракатларини такрорлаган. Қиз унга қаршилик қилган ва эшик очилганида эркак чиқиб кетган. Судланувчи судда айбига тўлиқ иқрор бўлган. У бунга спиртли ичимлик таъсири остида қўл ургани, қилган ишидан пушаймонлигини билдирган.

Судланувчи Жиноят кодексининг 129-моддаси 2-қисмида назарда тутилган жиноятни содир этганликда айбли деб топилиб, Жиноят ишлари бўйича Тошкент вилояти Юқоричирчиқ туман судининг 2015 йил 6 майдаги ҳукмига кўра тайинланган жазонинг ўталмаган қисмини қисман қўшиш йўли билан узил-кесил ўташ учун 1 йил-у 6 ойга озодликдан маҳрум қилиш жазоси тайинланган. Жазони қаттиқ тартибли колонияларда ўташ белгиланган.

Мавзуга доир: Тошкентда маст ҳолда ЙПХ ходимини калтаклаган қизга суд ҳукми ўқилди — видео

Эслатиб ўтамиз, аввалроқ Бухорода ўз уйида фоҳишахона ташкил қилган 22 ёшли аёл қўлга олингани ҳамда Бухорода 2 нафар аёлга ОИВ инфекциясини қасддан юқтирган эркак қўлга олингани ҳақида хабар берилган.