Самарқанд вилояти Ургут туманидаги «Жартепа» чегара-божхона пости Тожикистонда ўқийдиган талабалар учун очилди. Бу ҳақда вилоят Божхона бошқармаси ахборот хизматига таяниб, «Zarnews» хабар берди.

Қайд этилишича, пандемия сабабли шу кунга қадар талабалар Тожикистонга фақатгина «Сариосиё», «Ойбек» ва «Плотина» чегара ўтказиш пунктлари орқали ҳаракатланиши мумкин бўлган. Масофанинг узоқлиги самарқандлик талабаларга қийинчилик туғдираётган эди. 2021 йил 17 февраль кунидан талабаларга Ургут туманида Тожикистон билан чегарада жойлашган «Жартепа» чегара божхона пости орқали ҳаракатланишларига рухсат берилган.

Хабарда айтилишича, пост орқали ҳозирча фақат Самарқанд вилоятида фаолият юритаётган тадбиркорлик субъектларининг экспорт-импорт операцияларини амалга оширишлари учун халқаро юк ташувчиларнинг юк автотранспорт воситалари ҳамда талабалар ҳаракатланиши белгиланган.

Маълумот ўрнида, «Жартепа» чегара божхона пости коронавирус пандемияси тарқалиши ортидан республика махсус комиссиясининг 2020 йил 30 апрель куни қабул қилган 20-сонли йиғилиш баённомасига кўра ёпилган эди.

Аввалроқ Россияда ўқийдиган ўзбекистонлик талабаларнинг мамлакатга киритилиши бўйича баёнот берилганди. Кейинчалик чет эллик талабаларга маълум бир шартлар асосида Россияга киришга рухсат берилгани хабар қилинган.