Тошкент шаҳри Бектемир туманида 16 февраль, сешанба куни йўл-патруль хизмати ходими ва фуқаро ўртасида тортишув содир бўлгани ҳақида хабарлар тарқалди. Йўл ҳаракати хавфсизлиги бош бошқармаси мазкур хабарга муносабат билдирди.

Хабарга кўра, видеолавҳа ўрганилганда 14 февраль куни ЙҲХБ ЙПХ ходими У.С. тақсимот асосида тунги хизматга Бектемир тумани ҳудудига жалб этилган ва хизмати давомида Х.Бойқаро кўчасида соат 03:00 ларда «Captiva» русумли автомобилни тўхтатган. Текширув давомида, ҳайдовчи ва ходим ўртасидаги ўзаро мулоқотга автомобилда бўлган йўловчи аралашган. ЙПХ ходимидан тўхтатиш асосини сўраб, эътироз билдирган.

ЙПХ ходими эса ҳайдовчига тушунтириш беришини, йўловчига тушунтириш беришга мажбур эмаслигини айтган. Ушбу вақтда ходим ҳамда йўловчи ўртасида ўзаро тортишув юзага келган. Қайд этилишича, мазкур ҳолат юзасидан Тошкент шаҳар ИИББ ЙҲХБ томонидан хизмат текшируви ўтказилиб, воқеа сабабларига ойдинлик киритилмоқда.

Мавзуга доир: 

• Сирдарёда ҳайдовчини қарғаган ЙПХ ходимига нисбатан текширув бошланди — видео
• Сурхондарёда ЙПХ ходими ҳайдовчига куч ишлатгани тўғрисидаги хабарга изоҳ берилди

Эслатиб ўтамиз, аввалроқ Хоразмда ЙПХ ходими маст ҳайдовчига нисбатан чора кўрмагани айтилган хабарга муносабат билдирилгани ҳақида хабар берилган.