Қуддусда олти йил ичида биринчи марта қор ёғди – фоторепортаж
Ҳудудда ҳаво ҳарорати янада совиб кетиши мумкин
Қуддус олти йил ичида биринчи марта қор билан қопланди. Маълум қилинишича, қор тун бўйи ёққан.
Маҳаллий ҳокимият табиатнинг кутилмаган «совғаси»га тезда муносабат билдирган ва йўл-транспорт ҳодисаларини олдини олиш учун жамоат транспорти ҳаракатланишини тақиқлаган.
Ноқулай об-ҳаво туфайли аҳолини эмлаш тўхтатилган, мактабларда дарслар бекор қилинмаган бўлса-да, одатдагидан кечроқ бошланмоқда, болалар боғчалари ҳам ўз фаолиятини давом этттирмоқда. Шунингдек, ҳафта охиригача қалинлиги қарийб 10 сантиметр бўлиши кутилаётган қор ёғишига тайёргарлик кўрилмоқда.
Агар керак бўлса, касалхоналар, тест синовлари ва коронавирусга қарши эмлаш марказлари каби асосий хизматлардан фойдаланиш имкониятини бериш учун режа тайёрланган.
Аҳоли табиат ҳодисасидан завқланишдан тўхтагани йўқ. Қор ёғаётганидан хурсанд бўлган одамлар кўчаларда қорбўрон ўйнаб, қорбоболар ясашган.
Иқлимшунослар об-ҳавонинг янада ёмонлашиши ва совуқ тушишини таъкидлашган.
Аввалроқ Грецияда кучли ёққан қор жамоат транспорти ҳаракатини бутунлай тўхтатгани хабар берилган, шунингдек, Москвада кучли қор бўрони сабаб 10 балли тирбандлик юзага келгани маълум қилинганди.
