Қашқадарёда маст йигит отасини ўлдириб қўйди — видео
Йигит танишидан пулини ололмагани учун спиртли ичимлик ичиб, жаҳл устида онаси ҳамда рафиқасининг кўз ўнгида отасига пичоқ уради
Қашқадарё вилояти Қарши туманида қотиллик жинояти содир этилди. Бу ҳақда «Zamon» информацион дастурида хабар берилди.
Маълум қилинишича, 2020 йилнинг 3 ноябрида йигит танишидан иш ҳақини ололмай, уйга маст ҳолда кириб келган. Алам устида уйдан пичоқ олиб чиқиб кетаётганда отаси уни тўхтатмоқчи бўлган. Шу пайт йигит жаҳл устида онаси ҳамда рафиқасининг кўз ўнгида отасининг чап кўкрак қисмига бир маротаба пичоқ уриб, ўлдириб қўйган.
Мазкур ҳолат юзасидан жиноятчига тегишли чоралар кўрилгани маълум қилинган.
Аввалроқ Ангренда эркак 2,5 ёшли қизнинг бошига уриб, уни ўлдириб қўйгани хабар берилган, шунингдек, бухоролик аёл рашк сабаб эрини пичоқлаб қўйгани маълум қилинганди.
