Самарқанд вилояти ҳокимининг туризм ва спортни ривожлантириш масалалари бўйича ўринбосари Ботир Нуруллаев вилоят кенгаши сессиясида Самарқанд–Жакарта авиарейси йўлга қўйилиши мумкинлигини маълум қилди, дея хабар бермоқда вилоят ҳокимлиги матбуот хизмати.

Ҳоким ўринбосарининг сўзларига кўра, бу борада Индонезия компанияси билан келишув имзоланган. Ҳозирда Жакарта–Самарқанд–Жакарта чартер авиа-рейсини ташкил этиш бўйича «Uzbekistan Airways» билан келишувлар олиб борилмоқда.

Қайд этилишича, Индонезия, Туркия, Покистон, Малайзия каби давлатлардан Имом Бухорий меросига қизиқувчи 100 мингдан ортиқ, Ҳиндистон, Туркия, Покистон, Бангладеш каби давлатлардан Абу Мансур Мотуридий меросига қизиқувчи 26 мингдан ортиқ, Индонезия, Малайзия, Туркия, Татаристон ва Чеченистон каби давлатлардан Хўжа Аҳрор Валий ва Маҳдуми Аъзам издошлари бўлган 43 мингдан ортиқ, Исроил, АҚШ, Франция ва Россиядан Хўжа Дониёр ҳамда яҳудийлар дини меросига талабгор 40 мингдан ортиқ зиёратчини жалб қилиш имконияти мавжуд.

«Бу борада Индонезиянинг йирик ASITA, SAPUHI туризм ассоциацияси билан ҳамкорлик алоқаларини ўрнатиш орқали Самарқандга ҳар ҳафтада 2 та авиарейс ташкил этиш режалаштирилган. Шу орқали 300 нафардан 500 нафаргача сайёҳни Самарқандга олиб келиш, бу ерда улар учун 2 кунлик зиёрат турларини ташкил этиш бўйича келишувлар имзоланган», дейилади хабарда.

Мавзуга доир:

• Тошкент–Нур-Султон–Тошкент йўналишида авиарейслар сони кўпайтирилади
• Тошкент–Франкфурт–Тошкент йўналиши бўйича доимий авиақатновлар тикланди

Аввалроқ Наврўз байрами арафасида Эрондан чартер рейслар йўлга қўйилиши, Ўзбекистон Германия билан авиақатновларни тиклагани ҳамда республика бўйлаб янги авиа ҳамда темир йўл қатновлари йўлга қўйилиши ҳақида хабар берилганди.