Президент қарори билан сув ресурсларини бошқариш ва ирригация секторини ривожлантиришнинг 2021–2023 йилларга мўлжалланган стратегияси тасдиқланди. Бу ҳақда Адлия вазирлигининг Telegram каналида хабар берилди.

Хабарга кўра, мазкур стратегия доирасида:

• сув таъминоти даражаси паст бўлган суғориладиган майдонлар 526 минг гектардан 424 минг гектаргача камайтирилади;
• сувни тежайдиган суғориш технологияларини жорий қилиш 308 минг гектардан 1,1 миллион гектаргача, шу жумладан, томчилатиб суғориш технологияси 121 минг гектардан 822 минг гектаргача етказилади;
• шўрланган майдонлар 1 926 минг гектардан 1 888 минг гектарга қисқартирилади;
• қишлоқ хўжалигида фойдаланишдан чиқиб кетган жами 232 минг гектар суғориладиган ер майдонлари қайта фойдаланишга киритилади;
• «Smart Water» («Ақлли сув») рақамли технологияси асосида сувнинг ҳисоби юритиладиган сув хўжалиги объектлари сони 18 576 тагача етказилади;
• 60 та йирик сув хўжалиги объекти рақамли технологиялар асосида автоматлаштирилган бошқарувга ўтказилади;
• Сув хўжалиги вазирлиги тизимидаги 1 688 та насос станциясидаги 5 231 та насос агрегатининг электр энергияси истеъмоли ва сув сарфи ҳисобининг мониторинги «онлайн» режимда олиб борилади;
• сув хўжалигида давлат-хусусий шериклик тамойиллари асосида жами 124 та лойиҳа амалга оширилади.

Шунингдек, 2021 йил 1 октябргача этилен полимерлари (ТИФ ТН коди 3901) ва пропилен полимерларини (ТИФ ТН коди 3902) олиб киришда божхона божининг ноль ставкаси белгиланди. Қайд этилишича, 2021 йил 1 июлгача сув ресурсларининг автоматлаштирилган идоралараро ахборот тизими босқичма-босқич ишга туширилади.

Мавзуга доир: 

• Ўзбекистонда 2021 йилда сув танқислиги бўлиши мумкин — Сув хўжалиги вазирлиги
• «Қишлоқ хўжалиги жамғармасига 24 триллион сўм маблағ йўналтирилмоқда» — Президент

Эслатиб ўтамиз, аввалроқ Ўзбекистонда сув тежовчи технологиядан фойдаланганларга субсидиялар берилиши ҳақида хабар қилинган.