Соғлиқни сақлаш вазири ўринбосари Абдулла Азизов Жаҳон банки ҳамда Ахборот-коммуникация технологияларини ривожлантириш жамғармаси томонидан молиялаштирилаётган лойиҳалардан бири —  чақириқларни тўғридан тўғри тез тиббий ёрдам бригадаларига электрон тарзда етказиш механзми ҳақида маълумот берди.

Қайд этилишича, янги тизимни ишга туширилиши билан:

• чақириқ манзилига энг яқин бўлган бўш турган тез тиббий ёрдам бригадасига хабар узатиш;
• тез тиббий ёрдам машиналари ҳаракатини онлайн кузатиб бориш;
• аввал кўп вақт талаб этилган статистик маълумотларни бугунги кунда онлайн олиш;
• шифокор овозини автомат шаклда матнга ўгириш;
• касалликларнинг кунлик, ойлик ва йиллик динамикаларини кузатиб бориш каби қатор имкониятлар йўлга қўйилган.

«Авваллари чақириқ хақидаги барча ахборотлар диспетчер томонидан қоғозга туширилиб, сўнг телефон орқали бригадаларни йўналтирувчи иккинчи диспетчерга мурожаат қилинарди ва у ҳам маълумотларни қоғозга қайд этиб бригадага шу тўлдирилган қоғоз орқали хабар узатилар эди. Бу жараён учун кўп вақт талаб этилар ва баъзи ҳолларда тез ёрдам машинаси кечикишига ҳам сабаб бўларди.

Энди бу жараёнлар тарихга айланмоқда. Яъни, янги яратилган тизимда бир маротаба олинган маълумотлар диспетчер томонидан электрон тарзда бригадага тўғридан тўғри узатилади ва бу билан чақирувни етказиш вақти сезиларли даражада камайишига олиб келди», — дейди вазири ўринбосари Абдулла Азизов.

Шунингдек, ушбу янги тизимда мурожаатларни қабул қилишдан беморнинг шифохонага жойлаштиришгача бўлган барча жараёнларни тўлиқ назорат қилиш имконияти бор. Бундан ташқари, юртимиз бўйлаб тез тиббий ёрдам кўрсатиш хизматлари тизимида Сall-марказлар ташкил этилиб, у ерда шифокорлар ҳам фаолият юритмоқда.

Вазир ўринбосарининг сўзларига кўра, ривожланган мамлакатларда тез тиббий ёрдам бригадаси ташриф буюрганда 80 фоиздан ортиқ ҳолатда беморларга шошилинч равишда даво чораларини кўриш учун шифохоналарга етказилади. Ўзбекистонда эса бу кўрсаткич 15–25 фоизни ташкил этади.

«Шундан келиб чиқиб, аҳолига ‘103’ га ҳақиқатан тез ва биринчи тиббий ёрдамга муҳтож, аҳволи оғир беморлар бўлсагина мурожаат қилиш кераклигини тушунтириш зарур. Шунда тез тиббий ёрдам бригадаси янада тез ва сифатли хизмат кўрсатишига эришиш мумкин», — дейди Абдулла Азизов.

Мавзуга доир: Ҳудудларда туманлараро қўшма шикастланишлар ва ўткир қон-томир касалликлари марказлари ташкил қилинади