Microsoft дастурий таъминотига бўлган хакерлик ҳужуми билан боғлиқ вазият глобал киберхавфсизлик инқирозига айланиши мумкин. Бу ҳақда «Bloomberg» хабар берди.

Маълум қилинишича, «Exchange Server» дастурий таъминотидаги нуқсон туфайли дунёда камида 60 минг ташкилотнинг маълумотлар базаси бузилган. Кибержиноятчилар эса компания барча мижозларини тўлиқ ҳимоя қилишидан олдин иложи борича кўпроқ компьютерларни зарарлашга ҳаракат қилмоқда.

АҚШ ҳукумати вакилининг агентликка хабар қилишича, мамлакатда фаолият юритувчи барча бошқарув органлари хакерлар ҳаракатларининг оқибатларини баҳолаш ва олдини олиш чораларини кўрмоқда.

«Таҳдид кўрсаткичи ошишда давом этмоқда. Шу боис Интернет-тармоқ операторларини бунга жиддий муносабатда бўлишга чақирганмиз», — дея таъкидлаган агентлик суҳбатдоши.

«Microsoft» компаниясининг «Exchange Server» почта қутиси серверларига бўлган ҳужуми ҳақида 2 март куни эълон қилди. Компания маълумотларига кўра, ҳужум Хитойнинг «Hafnium» номли хакерлар гуруҳи томонидан амалга оширилган.

«Ҳужумдан мақсад юқумли касалликлар бўйича тадқиқот олиб борувчи олимлар, юридик фирмалар, университетлар, нодавлат ташкилотлар, таҳлил марказлари ва бошқа бир қатор ташкилотлардан маълумот олишга ҳаракат қилиш бўлган»,— дейилади Microsoft хабарида.

Таъкидланишича, гуруҳ аъзолари ҳужум пайтида номаълум механизмдан фойдаланган.

Аввалроқ iPhone ва iPad эгаларига хакерлардан ҳимояланиш учун созланмаларни янгилаш тавсия қилингани хабар берилганди. Шунингдек, Японияда вакцина ишлаб чиқувчиларга киберҳужумлар уюштирилгани маълум қилинганди.