Қўқон давлат педагогика институтига ўқишга киритиб қўйишни ваъда қилиб, 3 минг доллар олган табиий фанлар факультети декани суд қилинди. Бу ҳақда «Daryo» хабар берди.

Хабарга кўра, институтнинг табиий фанлар факультети декани лавозимида ишлаган В.У. фуқаро Г.И.га ушбу олий таълим муассасасининг жисмоний маданият факультетига ўқишга киришида ёрдам беришини ваъда қилган. Декан ушбу институтнинг ички назорат ва мониторинг бўлими услубчиси вазифасида ишловчи Х.Б. билан олдиндан жиноий тил бириктириб, фуқародан 3 минг доллар талаб қилган.

Қайд этилишича, Бош прокуратура ҳузуридаги департаментнинг Қўқон шаҳар бўлими ва Давлат хавфсизлик хизмати ходимлари ҳамкорлигида ўтказилган тезкор тадбирда институт декани ва услубчиси талаб қилинган пулларни олаётган вақтида ушланган. Жиноят ишлари бўйича Данғара туман суди ҳукмига кўра, В.У. Жиноят кодексининг тегишли моддаларига асосан бир йил муддатга мансабдорлик ва моддий жавобгарлик лавозимларида ишлаш ҳуқуқидан маҳрум қилинган. Шунингдек, унга нисбатан 44 миллион 600 минг сўм жарима жазоси тайинланган.

Маълум қилинишича, Х.Б. эса бир йил моддий жавобгарлик ва мансабдорлик лавозимларида ишлаш ҳуқуқидан маҳрум қилиниб, 16 миллион 725 минг сўм жаримага тортилган.

Аввалроқ Тошкентда «Миллий» стадионига қоровулликка ишга жойлаш эвазига фуқародан 1,5 минг доллар талаб қилганлар ушлангани ва Тошкентда 6,5 минг долларга «Ўзбекистон темир йўллари»га ишга киритиб қўймоқчи бўлган ходимлар қўлга тушгани хабар қилинган. Шунингдек, Нукусда фуқародан ички ишлар тизимига ишга киритиб қўйиш учун пора сўраган шахс ушланган.