ЮНEСКО таълим соҳасидаги билимлар ва инновацион алмашув бўйича глобал ҳамкорлик ташаббуси доирасида Ўзбекистондаги ўқитувчилар малакасини оширишга 435 минг доллар ажратади. Бу ҳақда Халқ таълими вазирлиги ахборот хизмати хaбар берди.

Хабарга кўра, Тошкентда «Ўзбекистонда ўқитувчиларнинг малакасини ошириш ёндашувларини мослаштириш ва кўламини кенгайтириш» илмий лойиҳа бошқарув қўмитасининг виртуал йиғилиши бўлиб ўтди. Тадбирда халқ таълими вазири биринчи ўринбосари Усмон Шарифхўжаев, шунингдек, ЮНEСКОнинг Ўзбекистондаги ваколатхонаси, Абдулла Авлоний номидаги илмий-текшириш институти ҳамда Миллий университет вакиллари иштирок этди.

Қайд этилишича, Халқаро тараққиёт-тадқиқот маркази кўмагида ташкил этилган тадбирдан асосий мақсад миллий манфаатдор томонлар билан биргаликда ўқитувчиларнинг малакасини ошириш моделларини ишлаб чиқишдан иборат. ЮНEСКОнинг «Гана, Гондурас ва Ўзбекистонда ўқитувчиларнинг малакасини ошириш ёндашувларини мослаштириш ва кўламини кенгайтириш» лойиҳаси доирасида Халқаро тараққиёт-тадқиқот маркази томонидан (GPE -KIX) таълим соҳасидаги билимлар ва инновацион алмашув бўйича глобал ҳамкорлик ташаббуси доирасида Ўзбекистондаги ўқитувчилар малакасини оширишга 435 минг доллар ажратилиши кўзда тутилган.

Маълум қилинишича, икки йиллик лойиҳа (2020–2022) доирасида Қорақалпоғистон, Навоий ва Тошкент вилоятларида 150 мактаб ва 600 дан ортиқ ўқитувчиларни жалб этган ҳолда уларнинг малакасини ошириш модели ишлаб чиқилади.

Эслатиб ўтамиз, аввалроқ Шерзод Шерматов ва АҚШ элчиси Дэниел Розенблюм Ўзбекистондаги таълим муассасаларида дарс бериш учун АҚШдан келган 26 нафар инглиз тили ўқитувчи ва олимлардан иборат гуруҳни кутиб олгани маълум қилинганди. Кейинчалик Шерзод Шерматов ана шу ўқитувчилар олиб борадиган ишлар ҳақида маълумот берган эди.