«Тошкент шаҳар сув таъминоти» корхонасининг директор ўринбосари ва бўлим бошлиғи 3 миллион сўм пора билан қўлга тушди. Бу ҳақда Ички ишлар вазирлиги ахборот хизмати хабар берди.

Хабарга кўра, 2021 йил 16 март куни фуқаро А.Э. ИИВга ариза билан мурожаат қилиб, бу ҳақда маълум қилган. Унинг тадбиркорлик қилиш мақсадида Юнусобод тумани 6-марказдаги бекатни ижарага олиб, бекатга ўтган сув қувурига уланиб, ҳисоблагич ўрнатгани маълум бўлган. Шунингдек, ҳужжатлаштириш учун Тошкент шаҳар «Сувсоз» бошқармасига мурожаат қилганида корхона ходими сув қувурини ўзбошимчалик билан улаганини рўкач қилиб, жаримага тортмаслик эвазига 3 миллион сўм беришини талаб қилаётганлигини айтиб ўтган.

Мазкур аризага асосан, шу куни Ички ишлар вазирлиги жиноят қидирув бош бошқармаси Коррупция ва иқтисодий жиноятларга қарши курашиш бошқармаси ҳамда Бош прокуратура ҳузуридаги Иқтисодий жиноятларга қарши курашиш Департаменти Тошкент шаҳар Юнусобод тумани бўлими ходимлари ҳамкорлигида ўтказилган тезкор тадбир давомида «Тошкент шаҳар сув таъминоти» МЧЖ бўлим бошлиғи Ҳ.М. Учтепа ҳокимлиги яқинида ариза муаллифи А.Э.дан 3 миллион сўм олган вақтда ашёвий далиллар билан ушланди.

Қайд этилишича, ушланган шахс ушбу пулларни корхона директор ўринбосари П.Р.нинг топшириғига асосан олганини ва пулларнинг бир қисмини унга бериши лозимлигини маълум қилган. 2021 йил 17 март куни тезкор тадбир давом эттирилиб, П.Р. хизмат хонасида Ҳ.М.дан 3 миллион сўм миқдоридаги пуллардан 1 миллион 800 минг сўмини олган вақтда ашёвий далиллар билан ушланди.

Мазкур ҳолат юзасидан, 17 март куни Бош прокуратура ҳузуридаги ИЖҚК Департаменти Тошкент шаҳар Юнусобод тумани бўлими томонидан Жиноят кодексининг 210-моддаси 2-қисми «г» банди билан жиноят иши қўзғатилиб, П.Р. ва Ҳ.М.лар Жиноят процессуал кодекснинг 224-моддаси тартибида ушланган. Жиноят иши юзасидан тергов ҳаракатлари олиб борилмоқда.

Аввалроқ Сирдарёда солиқ бошқармаси бўлим бошлиғи 1000 доллар пора олаётганида қўлга тушгани ва Қўқон давлат педагогика институти декани 3 минг доллар пора сўрагани учун суд қилингани хабар қилинган эди. Шунингдек, Булоқбоши туман қурилиш бўлими мутахассиси пора билан қўлга тушгани маълум қилинган.