Колорадода отишма, Австралиядаги сув тошқинлари, исроиллик босқинчиларга қарши ҳаракат, қочоқлар лагеридаги ёнғин — 23 март суратлари
АҚШнинг Колорадо штатидаги супермаркетлардан бирида отишма содир бўлди. Мазкур ҳодиса натижасида 10 киши ҳалок бўлгани айтилмоқда. Ҳалок бўлганлардан бири ўша ҳудудда хизмат вазифасини ўтаётган полициячи бўлган.
Бу АҚШдаги бир ой ичидаги иккинчи йирик отишмадир. Бундан аввал Атлантада осиёликларга тегишли бўлган Спа-салонда отишма юз берган эди.
Бир неча кундан буён Австралияда сўнгги ўн йилликларнинг энг йирик сув тошқинлари юз берди. Табиий офат оқибатида кўплаб биноларга шикаст етган. Юзлаб инсонлар хавфсиз ҳудудларга эвакуация қилинган. Қолганлар эса томларда кун кечирмоқда.
Мьянмада оммавий қирғинга учраган этник озчилик бўлган Роҳинжа мусулмонлари Бангладешдан бошпана топган эди. Бугун, яъни 23 март куни Роҳинжа мусулмонлари яшаётган Бангладешдаги Балухали қочоқлар лагерида катта ёнғин келиб чиққан. Натижада юзлаб кишиларнинг бошпанаси ёниб кетган ва камида етти киши вафот этган.
Фаластинда, Иордан дарёсининг ғарбий соҳилида, Исроилнинг колонизациялаш сиёсатига қарши бўлган фаластинликлар уларга қарши ҳаракат қилиб келмоқда. Бугун ҳам Исроил ҳарбийлари ҳамда тинч аҳоли вакиллари ўртасида тўқнашув юзага келди.
