Россия ҳудудига коронавирус инфекцияси кириши ва тарқалишининг олдини олиш бўйича тезкор штаб томонидан мамлакатга чет эл фуқароларини ишга жалб қилиш бўйича ҳаракатлар алгоритми тасдиқланди. Бу ҳақда Ташқи меҳнат миграцияси агентлиги ахборот хизмати хабар берди.

Маълум қилинишича, алгоритмда чет эл фуқароларини ишга жалб қилиш учун иш берувчи ташкилот қуйидаги талабларга жавоб бериши белгиланган:

• миллий, федераль ёки минтақавий лойиҳаларни амалга оширишда иштирок этиши;
• штатдаги ходимлари сони камида 250 нафар бўлиши;
• даромади 2 миллиард рублдан ортиқ бўлиши;
• солиқлардан қарзи йўқ бўлиши.

Шунингдек, «Работа в России» порталида иш берувчи ташкилотларнинг чет эл фуқароларини ишга жалб қилиш бўйича буюртмалари шакллантирилади, талабномалари жойлаштирилади ва бошқа жараёнлар амалга оширилиши маълум қилинди. Бундан ташқари, меҳнат мигрантлари учун транспорт, овқатланиш, турар жой ва карантин жойларини ташкил этиш иш берувчи ташкилот томонидан таъминланиши қайд этилган.

Аввалроқ Ўзбекистонда январь–февраль ойларида қанча фуқаро хорижга ишлаш учун жўнаб кетгани ва Ўзбекистон фуқаролари Россияга кириши учун рухсатнома берилаётгани ҳақида хабар қилинган эди. Шунингдек, Россияда ишламоқчи бўлган ўзбекистонликларга қурилиш соҳасида 4 мингга яқин иш ўринлари таклиф этилган.