Тожикистонда ўткир юқумли полиомиелит касаллиги тарқалди. Бу ҳақда ЖССТ баёнотига таяниб, «РИА Новости» хабар берди.

Маълум қилинишича, Асаб системасини фалаж қиладиган хасталик ҳозиргача 4 нафар болада аниқланган. Мамлакатдаги вазият фавқулодда ҳолат сифатида таснифланган.

Жаҳон соғлиқни сақлаш ташкилотининг баёнотида айтилишича, юқумли касаллик билан боғлиқ ҳолатни текшириш ишлари олиб борилмоқда.

Маълумот учун, полиомиелит ўткир юқумли касаллик бўлиб, бунда марказий нерв тизими зарарланади. Фалаж билан ёки фалажсиз кечади. Қадимдан маълум бўлган хасталик, айниқса, болалар ўртасида кенг тарқалган. Вирус ҳаво-томчи йўллари орқали (аксирганда, йўталганда), шунингдек, ифлосланган сабзавот, мева, қайнатилмаган сув, сутни истеъмол қилганда организмга ўтади. Ёз ва куз ойларида полиомиелит кўпроқ учрайди. Касаллик ўткир бошланади: беморнинг ҳарорати 38–39 даражагача кўтарилади, йўтал, аксириш, томоқ оғриши, қоринда оғриқ пайдо бўлиши ва ич кетиши кузатилади. Бу белгилар 4–5 кундан кейин ўтиб кетади, бир ҳафтадан сўнг ҳарорат яна кўтарилади ва турли мушаклар, айниқса, оёқ ва қўллар фалажи авж олади.

Аввалроқ Тожикистонда аҳолини коронавирусга қарши эмлаш бошлангани ҳақида хабар берилганди.