Миллий матбуот марказида 24 март куни ўтказилган матбуот анжуманида Ўзбекистон Иқтисодиёт ассамблеяси раиси Мухтор Умаров Ўзбекистонда мебелчилар саноат зонаси ташкил этилиши борасида маълумот берди. Бу ҳақда «Bugun.uz» мухбири хабар берди.

Мутасаддининг қайд этишича, мазкур саноат зонаси Туркиянинг Анқара шаҳрида 1960 йилда ташкил этилган жой андазалари асосида ишга туширилади. У Ўзбекистон Иқтисодиёт ассамблеяси томонидан яқиндан ўрганилган зона — Анқарадаги 500 гектар ерни эгаллаган O‘zTeam мебель саноат зонаси соҳа учун алоҳида 4 та инситутлар ташкил этгани, ҳаттоки мебель соҳасининг соҳа илмий тадқиқот марказида ишлайдиган бир гуруҳ профессор ўқитувчилари фаолият олиб бораётгани ҳақида гапириб ўтар экан, Туркия ташкилотида саноат билан илмнинг якдиллигини кўриш мункинлигини айтиб ўтди.

Шунингдек, ассамблея Ўзбекистонда мебель саноатини ривожлантириш учун O‘zTeam ташкилоти билан шартнома имзоланганини маълум қилди. «Туркия ўз мебель ишлаб чиқариш тажрибаларини Ўзбекистон билан ўртоқлашади. Чет элнинг неча йиллар давомида тўплаган тажрибаси асосида ишни йўлга қўйиш Ўзбекистон мебель саноати учун катта фойда келтиради», — дея таъкидлади Ўзбекистон Иқтисодиёт ассамблеяси раиси.

Мухтор Умаров мебель саноатида бутловчи қисмларга қўйилган божларнинг олиб ташлангани, тайёрлашда мутахассислар етишмовчилиги каби муаммолар ўз ечимини топаётгани ҳақида гапирди.

Шу билан бир қаторда, у Ўзбекистонда мебелчилар саноат зонаси қурилиши учун ҳозирда ҳукумат 50 гектар ерни саноат кластери сифатида бепул бериши ҳақида Президент қарори лойиҳаси ишлаб чиқлаётганини ва зонадаги коммуникация жиҳозлари давлат томонидан бепул олиб келиб берилишини айтди.

Мавзуга доир: Ўзбекистонда 2020 йилда мебель маҳсулотлари экспорти қанчага ошгани ва уларни энг кўп экспорт қилган ҳудудлар рўйхати маълум қилинганди.