Озод бўлган кема, очиқ ҳавога чиқаётган Англия, Дерек Шовин суди, Гаитида президентга қарши намойишлар — 29 март суратлари
23 мартдан буён Сувайш каналида саёзликка чиқиб қолган Evergreen компаниясига тегишли контейнер ташувчи кема ниҳоят бугун, 29 март куни «озод» қилинди. У яна ўз йўналишига тушиб олди. Кемани сувга қайтариш ишлари бир ҳафта давом этди.
2020 йилнинг энг кўп муҳокамаларга сабаб бўлган воқеаларидан бири бу, шубҳасиз, ўша йилнинг 25 май куни Миннеаполис шаҳрида афроамерикалик Жорж Флойднинг полиция ходими Дерек Шовин томонидан тиззаси билан бўғиб ўлдирилиши бўлган эди. Мазкур воқеа ортидан бутун дунёда қора танлилар дискриминациясига қарши норозилик намойишлари бўлиб ўтди. Бугун, 29 март куни Дерек Шовин устидан суд жараёни бошланди. Суд бошланишидан аввал журналистлар учун матбуот анжумани ташкил этилди. Унда адвокатлар, прокуратура ходимлари, Жорж Флойднинг яқинлари иштирок этиб, журналистлар саволларига жавоб берди. Суратларни қуйида кўришингиз мумкин.
Коронавирус ҳали-бери бизни тарк этишни истамаяпти. Айрим давлатлар карантин чораларини кучайтирмоқда, айримлари юмшатмоқда. Англияда ҳам бугундан коронавирусга қарши чоралар бир оз енгиллаштирилди ва очиқ ҳаводаги спорт мажмуалари мижозларни қабул қилишни бошлади. Бейсбол майдонлари, теннис кортлари, очиқ сув ҳавзалари шулар жумласидандир. Бизда эса ҳамма футбол ўйнаб юрибди. Англияни томоша қиламиз.
Ажабланманг, бу хурсандчилик кўз ёшлари
Ўз мамлакатининг конституциясига ўзгартириш киритиш орқали ҳокимиятини узайтиришни истаган Гаити президенти Жовенел Моисга қарши халқ норозилик намойишларига чиқди. Иқтисодий инқироз ичра қолган гаитиликлар Моиснинг ноқонуний равишда ҳокимиятда қолишини истамаяпти. Намойишлардан олинган суратларни томоша қилинг.
